بمناسبة استيراد عمالة صينية الحكاية.. جابت ليها عرس...!!!! (2)

ودخلت الشركات :
إمتلأت الصحف بإعلانات الشركات التى دخلت مجال إستيراد العرسان (شركة نصف الدين لإستيراد العرسان المرطبين) ، وقد تخصصت فى إستيراد (عرسان) ذوى كفاءة مالية تتناسب مع عوانس (الطبقات العليا) ، شركة (ليسكنوا) للعرسان العاديين العاوزين (يسكنو وبس) ، شركة (عريس السرور) وكذلك شركة (عريس الكرور) والتى تقوم بإستيراد عرسان (قدر ظروفك) وقد فضلت بعض الشركات أن تقوم بالإستيرا فقط على أن تتولى شركات تجزئة القيام بمهمة البيع للجمهور !
فى سوق (سعد قشرة) تجمهر عدد من المواطنين أمام شخص يصيح بواسطة مايكرفون محمول وهو يضع أمامه عدد من العرسان الصينيين .. على عشرة .. على عشرة .. على شرة صينى مية المية وأهو ده الباسبورت .. والواقف داك المأذون .. عريس ميه الميه وأهى دى الشهاده الصحية .. لا بساهر (بره) لا بجيب ليك (ضره) .. علينا جاى ..
- عليك الله يا ود أمى قول للواقف فى النص ده قبل جاى خلينا النشوفو كويس
- ده ؟ اللابس الجينز ده ؟
- الوليد ده شغال شنو؟
- ده يا حاجه ما وليد ما تشوفيهو (سغيرونى) كده .. ده إسمو (وانغ يانغ ليو) وعمرو 39 سنة وشغال(فنى بتاع تبريد وتكييف) !
- أريتو عريس الهنا شوف الشعر نازل لى جبهتو كيفن - تلتفت نحو بنتها التى تقف خلفها - تعالى يا بت شوفى العريس ده بنفع معاكى !
- (تنظر إليه متفحصة) : قصير يا ماما .. قصير
- ويجيبو ليكى صينى طويل من وين؟ ما ياها دى البضاعة الفى السوق !
- (البائع يلتفت نحوها ) : خلاس يا حاجه ما مشكلة بكرة تعالى جايانا بضاعه (Xlarge ) بكره !
على واجهه شركة (راسين بالحلال) للإستقدام تم تثبيت لافتة قماشية كبيره كتب عليها بخط جميل ملون (يا ناس يا عسل العريس الصيني وصل) , تزاحم وهرج شديدين أمام مدخل الشركة مما دعا البوليس لتنظيم الصفوف
- والله أخير لينا بورتنا من الزحمة والمدافرة دى
- يا بت إنتى جنيتى؟ بورت شنو الأخير لينا والله كان قالو ليا أقيفى فى السراط المستقيم الليله أقيف ! هو نحنا صدقنا نلقى لينا عريس
بعد 40 سنة :
سيداتى أنساتى سادتى من إستاد الخرطوم الدولى يسرنا أن ننقل إليكم وعلى الهواء مباشرة المباراة الختامية لكأس الدورى الممتاز والتى تقام بين فريقى (التنين الاحمر) و(نجمة بكين)
كما تعلمون سيداتى وسادتى أن فريق (التنين الاحمر) قد وصل إلى هذه النهائيات بعد فوزه على فريق المريخ 5/صفر كما أن فريق (نجمة بكين) قد وصل بدوره إلى هذا النهائى بعد تغلبه على فريق الهلال (6/1) .. يدير المباراة حكمنا الدولى (شانغ فونغ لى) يعاونه فى الخطوط ( فينغ فو دان) و(وانغ فو لينغ) بينما يجلس كحكم رابع الحكم الدولى (شنغ فانغ شانغ) .. الآن سيداتى وسادتى يتقدم السيد (ليانغ لى فونغ) وزير الشباب والرياضة يصحبه السيد (شونغ فانغ لى) معتمد العاصمة القومية لمصافحة اللعيبة ...
الآن فى هذه اللحظة يطلق الحكم الدولى (شانغ فونغ لى) معلنا بداية المباراة .. الكورة مع فريق التنين الأحمر ... اللاعب فونغ وانغ (زرديه) بيلعب باص طويل جهه شونغ فانغ (طحنية) بيقطعا اللاعب شان لى فونغ (نملية) وبيعمل معاهو (فاول) ، الحكم بيديهو بطاقه (حمرا) ، ، يتوقف اللعب الآن وحتى يتم إخراج اللاعب من الميدان سيداتى آنساتى سادتى أشكر إنابه عنكم الفريق الإذاعى العامل الذى يقوم بنقل هذه المباراة لكم على الهواء مباشرة :
فى هندسة الصوت : شينغ شي تاو
على عربة النقل الخارجية : يانغ ياو شانغ
فى الإخراج : دونغ يونغ شاو
وينقلها لكم .. محدثكم : هوانغ ليانغ لين
كسرة :
هتافات الجمهور تتعالى : شانغ تشيو شونغ تشاو ....(التحكيم فاااااشل)

ايه رايك يا أستاذ : خالد تجى نعملها انا و انت و نعلن عن زواج جماعى (كورة) و نجيب العروس التانية ، اضمن ليك نجاح المشروع 100% و احسب العضوية كم .. بس ابعد ابوخالد ، عندوا اربعة ..
الموضوع طريف يدل على فهم فى اختياره وثقافة جيدة .. بس يا ربى دا مشروع حيبعدك عن مشاكل التعليم و مدرسة العكد بنين .. وما تنسى مشكلة الاسبتس الطنشنا منها...
تحياتى ليك وحقيقة سعيد بأنك واحد من شباب هذا المنتدى الموعود بالخير

يا مبدع ........... اخونا النشط خالد
والله دى الحيقية الان هس فى الشركة الاتصالات السودانية اغلبية العمالة صينية فى اى مكتب
تلقا صينى ..... باقى حاجة واحدة بس يرفعوا العلم الصينى .

شكرا الاخوان احمد وحامد على المرور والتعليق الجميل
بالمناسبة ديل لو جو حيحلو لينا قضية التعليم زاتو وماتستبعد يحفروا البلد كلها ويغيروا شبكة المياه في ليلة واحدة بس..... ديل ولاد عمك "صين" وانت عارف صين يعني شنو يعني ناس "صيانة" بالفطرة ومن هنا جاءت كلمة "الصين"

مشكور الأخ خالد على هذه التعريجة على وزن تخريمة للترفيه طبعاً ما تعريحة كونشينة الصيينين مسكوا اى شى بدو من الواطة حفر وصلوا الكهرباء والبترول وهسع ماشين على الزراعة جاوكم يامزارعين لكن نحن بى كسلانا ده ماظن يعرسوا نسوانا الكسلانات ديل الواحد يمشى يشتغل الورديه الاولى يجى يلاقى المرأة نااااااايمة الا يعرس اربعة عشان المنافسة مع الصناعة اليابانية

مشكورين يعقوب ومرضي وعوض على المرور السريع وربنا يستر من الزمن الجاي علينا....