طالبة عريس ( فتاة الجامعة )

صديقي الاستاذ اسامة عثمان البدوي جمعتني به الدراسة بجامعة القاهرة الفرع وكنا في السنة الاولى مغرمين بحضور المنتديات الشعرية التي كان روادها اغلبهم من الذين يذوبون في الحب والرومانسية تجد كل الأحبة ( اثنين اثنين ) ،، شانهم شان كل المحبين كليلى والمجنون.. وروميو وجوليت ,,ولسان حالهم يقول

لا خير في الدنيا بغير صبابة ... ولا في نعيم ليس فيه حبيب

وكان من روادها جميلات الجامعة من كل الكليات طمعا في ان يكتب الشعراء فيهن القصائد فكما وصفهن ,, ود بادي ,, عيونن واسعة تبلع ميه زي ولدك ,, تشرك للموحد والضلالي ,, اما انا واخي لم تكن تعنينا العيون الدعج والمباسم الفلج والحواجب الزج في ذلك الوقت فكنا نجلس الاثنين سويا في الصفوف الاولى من المنتدى ويقسم كل من يرانا اننا اتينا من كوكب آخر كنا نستمتع بهذه الاشعار غير آبهين بتلك التعليقات من هنا وهناك نستمع لهذه القصائد التي يتبارى الشعراء في القائها واليكم جزءا من هذه القصيدة التى نالت اعجابنا قصيدة فتاة الجامعة التي تطلب عريسا والتي تقول فيها :

لي إيدينا بنرفع والعازب كلو بيسمع
نفوسنا كتير مشتاقة للراعي دوام نتضرع
شعارنا عريس متواضع ياقدر اسمع أجمع
نحن البايرات في لهفة والعمر ولي وودع
نحن مساكين ياجماعة وللجنة دوام نتطلع
لو واحد قام وأتقدم في لحظة نلبي ونسمع
بلاش عربية خصوصي مالو الكداري دا هسع
بلاش من شبكة وشيلة بي أبسط حاجة بنقنع
البيت ماشرط عمارة دي مظاهر ساكت تخدع
لي جنة نضيرة نحول البيت الخرب البجمع
ما شرط تجيب تلاجة كفاية الزير البنقع
ما دايرين كبدة وشـية بي ويكة تقيلة بنشبع
ما أصلو شبابنا الودع ما ممكن تاني بيرجع
أحلامنا الكانت بدري ما عادت تاني بتنفع
دايرين الشاب الأغبش حتى لو فقران ومقطع
لانو الفيهو الفايدة ليهو دوام نتطلع
حياة السترة أملنا ان شاء الله ربنا يجمع
يحن الله علينا ونشيل أيدينا ونرفع
للرب شكوانا بنرفع والباير كله بيسمع
في دربك ياما جرينا والعين الساهرة بتدمع

وللحديث بقية

شيخ الصادق لاشك بأنه فاض بيها وكما قيل لسان الحال غلب
وكقول إحداهن :
عريس إن شاء الله كان ككو ومن البورة نتفكو
عريس إن شاء الله ماواعي يجيب الشيلة قطاعي
بس هو يجيء
عريس إن شاء الله كان أحوص يسك الرقشة قايله بص
بس هو يجيء
قيل لأحد البايرات وهي خريجة هندسة خطيبك مالو كسيح
فردت أنا عاوزا أسطر بيو ؟ أنا عاوزاه عريس

الاستاذ سراج الرجل الذي ملا حمله آفاق المنتدى الشكر لك على المرور والاضافة وطلب البنات للعرس يظهر في مجتمعنا السوداني على استحياء لان مجتمعنا محافظ والحمد لله ,, وان حدث هذا فلا تلام من تفعل ذلك ربما كما ذكرت يا اخ سراج فاض بها ,,,

الغالي الصادق والله دي شحدة عديل :
وناس سيد الكارو تعال
تعال بالشايلو
تعال بالعندك بيت ابوي بسندك
تعال بقميصك ..
والقصيدة تطول .. يعني الواحد بعد كدة يبقى قاعد ينتظر يجي يخطبوه

الغريبة يا ابوخالد زى ما قال محمد النجوم دى شحدة عدييييييييييييييييييييييل .. لكن هل توافقونى و الكلام للنجومى و سيد الكارو ، انو البورة بتخلى الواحدة تمسك فى اى واحد و تبقى زى الغرقان البيتعلق بى قشاية..
و هل ياترى يا ابوخالد الواحدة بعد ما تلقط الراجل بتقتنع بالواقع
ما شرط تجيب تلاجة كفاية الزير البنقع
ما دايرين كبدة وشـية بي ويكة تقيلة بنشبع