كلام بالدارجي الفصييييييييييح

مشرف عدد المساهمات : 331 تاريخ التسجيل : 16/02/2009

السلام عليكم ورحمة الله

والله ياخوانا المنتدى دا بي صراااااااااااااااااحة كدي بقى لينا زي كباية شاى الصباح الواحد كان غبَ منو بي الغلط يحس بي صداع تقول راسوا داير ينشق فجأة كدي يتذكر انو ماخشى منتدي العكادة انشاء الله بس يعاين ليهو ويقفلو بس زي مابقولوا القحة ولا صمة الخشم ايا والله بعدين حتى ماتقولوا انا زولاً بدور الشمارات خاصة الشمار لامن يبقي فريش يعني من نارو كدي والحاجات دي بقينا من الساهل نلقاها مع المنتدى لانو العولمة بارك الله فيها بقت مابتفرز البعيد من القريب يعني الناس بقت في بيت واحد بس اللهم تاخد لك ساعة من زمنك تخش على العنكبوتية دي وكررررررررر تجيب خبر الجاي والجاي وبيني وبينكم نسوانا الفي العكد ديل كان لقن لهن زول يمحى ليهن الامية التقنية والله العظيم اول حاجة يسونها انتو عارفنها شنو يتلملمن ويعملن لهن صندوق (صرفة) حق نت عشان كلو واحدة يكون عندها جهاز في بيتا لأنو والله نسوانا ديل بقن بصااااااااااااااار علي المعايش يعني الواحدة لو اديتها خمسة جنية كل يوم تلقاها رجتك اكلك وشرابك وبعد دا تلقاها خاشة صندوق بي جنيهين الكلام يمكن بعرفوهو الساكنين العكد اما انتو يالمغتربين يمكن تشوفوهوا مستحيل حبة لكن عارفين الواحدة تشتري ليها نص ربع لحمة (قيقم) كان من النوراني ولا عبد الله ود عثمان ود عبد الواحد عليهن سلطة بي جنية والباقي اي نوع خضار بي جنية علي كدي الباقي تربطو فى طرف توبها توزعوا على الصناديق عشان تعمر بيتا بي مزااااااااااااج وزي مابقولوا الجبل من الحصحاص، بعدين كان الصندوق بقى كبير شوية والختة ماكنة ممكن يمتد تفكيرها لي بنيان القطعة شرق الزلط ودا كلام براهو كمان لأنو البنيان بالطريقة الجديدة المبسطة بقي فى متناول الجميع وفي اخر زيارة لي العكد اخدت لى لفة شرق الزلط لغاية السكة عشان اعرف البيوت الجديدة القامت والله بس ماشاء الله التقول بجيبوها جاهزة كان غبت اسبوع وجيت يلقاك قام مربوع بي حالو(دي واسعة حبة) ودا الكلام الخلا اراضي العكد تطير السما يعني كان ماعندك ارض شوف لك صندوق خشو من ضو، نرجع لي موضوع البنيان المبسط ومع انها فكرة قديمة لكن استحدثت من اخونا عبدالله ودالامين التميرابي والعقد الفريد مثل محمد ود عباس العشاري وعبد الله ود فتح الرحمن وديل انا لو بي يدي اديهم اكبر جائزة ممكنه لأنهم بحق ساعدو غالبية الشباب العرسوا وهم صغاااااااااااار وخلوا الكبار يتكابسوا في العرس انتو عارفين الشباب ديل استجدثو طربقة البنيان بالقشرة يعني طوب احمر + بلوك أخضر يديك بيت عجيييييب الجن مايعرفو مبني بي شنو خاصة كان لقى ليهو بياض من برة وماشاء الله عيني باااااااااردة الناس ديل يدقوا ليك الالف حق البلوك دا في ساعة زمن وانتو عارفين البيت كلو ماياخد معاك ثلاثة الف طوبة والالف كلو يدقوا ليك بي مية جنية اها بعد دا تتوكل وتجيب ليك نفير جمعتين تلاتة والبيت دا يناطح السماء لكن اهم شيء تكون بتجامل الناس عشان الناس تجاملك وزي مابقول عمنا يوسف وداحمد ودعجب الله يرحمو ويغفر ليهو (التسويهو تلقاهو) وبي سبب الجماعة ديل خلا الشباب العكادة كلهم يتكابسوا في العرس لكن برضوا في ناس كمان الله يزيدن بيبنو طوب احمر صر انشاء الله ربنا يفتح علينا وعليهم لكن في النهاية الخلاصة عرس ودا المهم وانتو عارفين الاعراس يمكن زادت بي معدل زيجتين لي تلاتة زيجات كل جمعة دا غير الاعراس الفي الاعياد وكدي، يعني والله حاجة ماشاء الله ربك يزيد ويبارك والله بس الواحد يقول لكم ياعبدالله عفارم عليييييييييييييييكم وكمان الصناديق الله يخليها لينا ويمكن اخر تجربة ممكن الواحد يقولا ليكم حصلت معاي انا زااااااااااااااتي وهي اني لامن الشتاء كرب قلت اجيب لي بطيطينية بعدبن انتو عارفين البطاطين اسعارا بتزيد في الشتاء وتطير السماء وقمت حدثت المرا بي موضوع البطاطين ديل وقالت لي على شنو الخسارة انا بخش في صندوق فلانة وادفع كل خمسطاشر يوم عشرة جنية وتجيك بطاطينك في محلك دا مالك ومال الغلبة طوالي نقذت الفكرة وهسع خلااااااااااااااااااااااس فضل لي قسط ولا اتنين وانتهي من حق البطاطين مع العلم انو سعر البطانية فى السوق خمسة وخمسين جنية بالكاش وبالصندوق واقعة معاي بي خمسة وستين جنيه يعني بي فارق عشرة جنيه بس ياسلاااااااااااااام عليكم الله دي ما نعمة عفارم عليك يابت ابو الجل.....!

عوافي خالد
كلامك كلو في محلو
وموضوعك يخلي الواحد يكملو للآخر
بس لدي تنويه ما تصرح في آخر موضوعك عفارم عليك يا بت 000000000 Surprised

موضوع: شكرا عمو عوض الأربعاء مارس 04, 2009 12:22 pm

لك التحية عمي وخالي عوض

ولك الشكر على الرد ولكن تصريحي في النهاية جاء من وحي اشهاري للزواج لأنو لو تمعنت الموضوع خاطبت فيه الطيور المهاجرة لأن كل احداثه لا تخفي على كل عكادي مقيم

..... وهذا ماأردت توضيحه

عافيت منك ياجني
وكلامك 100× المية
والف تحية لي ناس المروة ولحاقين البعيدة
!!!!!!!!!!!!!!!!!!!!!!!!!!!!!!!!!!!!!!!!

والله يا خالد موضوعك زي شاي المغرب اللذيذ في ذلك المغرب القارص في الشتاء، وأنا مركز على شاي المغرب لأنها من اللحيظات الجميلة التي قضيتها في الوطن وهي أنني قمت بزيارات كثيرة، وليس الهم في الشاي أو المكان ولكن في الناس وزي ما قالوا اهلنا المكان بالناس فقد كانت تلك اللحظة جميلة بنكهة الشاي اللذيذ صحبة عبد الله أحمد سعد، وعاصم ونكهة الموضوعات التي كانت هي بهارات الشاي لك الود يا خالد وأنت تدخل السرور في جنبات هذا المنتدى بهذا الدارج الفصيح...

لك الود خالد والتقدير
وإن كان هذا قصدك ومرامك فلك ما أردت
ومشكور مرة تانية على موضوعك الملم لكل جوانب الحياة في عكدنا الحبيبة